मराठा आरक्षण आंदोलन यशस्वी;पुर्णा शहरात जल्लोष

परभणी/पुर्णा, ता.२ (प्रतिनिधी)Maratha Reservation Newsमराठा आरक्षणासाठी अखंड लढा देणारे संघर्ष योद्धा मनोज जरांगे पाटील यांनी मंगळवारी (दि.२ सप्टेंबर) सायंकाळी मुंबई येथील आझाद मैदानावरून आंदोलन यशस्वी झाल्याची घोषणा केली. या घोषणेनंतर परभणी जिल्ह्यात ठिकठिकाणी तसेच पुर्णा शहरात सकल मराठा समाज बांधवांनी जल्लोष करीत आनंदोत्सव साजरा केला.

पुर्णा शहरातील छत्रपती शिवाजी महाराज पुतळा चौकात समाज बांधव मोठ्या संख्येने जमले. ढोल-ताशांच्या गजरात, डिजेच्या तालावर नृत्य, गुलाल उधळण, फटाक्यांची आतषबाजी आणि एकमेकांना पेढे भरवून आरक्षण विजयाचा आनंद व्यक्त करण्यात आला. यावेळी “छत्रपती शिवाजी महाराज की जय”, “एक मराठा लाख मराठा”, “मनोज जरांगे तुम आगे बढो” अशा घोषणा देत संपूर्ण परिसर दणाणून गेला.तसेच छत्रपती शिवाजी महाराज, डॉ. बाबासाहेब आंबेडकर आणि महात्मा बसवेश्वर यांच्या पुतळ्यांवर पुष्पहार अर्पण करून अभिवादन करण्यात आले. ऐन पावसातही हजारोंच्या संख्येने समाज बांधव उत्स्फूर्तपणे उपस्थित होते.या जल्लोषामुळे पुर्णा शहरासह संपूर्ण जिल्ह्यात उत्साह आणि समाधानाचे वातावरण निर्माण झाले आहे.

मराठा समाजास कुणबी जातीचे प्रमाणपत्र देण्याची प्रक्रिया सुलभ करण्यात येणार ;गावपातळीवर समित्या गठीत करण्याबाबत शासन निर्णय निर्गमित

जात प्रमाणपत्र देणे आणि त्याची पडताळणी करणे याकरिता सन २००१ चा महाराष्ट्र अधिनियम क्र. २३ व त्याअंतर्गत कार्यपध्दती निश्चितीकरिता नियम तयार करण्यात आलेले आहेत. यामध्ये हैद्राबाद गॅझेटिअर मधील नोंदी विचारात घेऊन मराठा समाजाच्या व्यक्तींना कुणबी, मराठा-कुणबी किंवा कुणबी-मराठा जातीचे प्रमाणपत्र मिळविण्याची प्रक्रिया अधिक सुलभ करण्यासाठी गावपातळीवर समित्या गठीत करण्याचा निर्णय घेण्यात आला आहे. याबाबतचा सामाजिक न्याय व विशेष सहाय्य विभागाने आज शासन निर्णय क्र. सीबीसी-२०२५/प्र.क्र. १२९/मावक दिनांक ०२ सप्टेंबर २०२५ निर्गमित केला आहे.गावपातळीवर गठीत समिती मध्ये ग्राम महसूल अधिकारी, ग्रामपंचायत अधिकारी, सहायक कृषी अधिकारी यांचा समावेश असेल.

मराठा समाजातील भुधारक तसेच भूमिहीन, शेतमजूर किंवा बटईने शेती करत असलेल्या व्यक्तींकडे शेत जमिनीची मालकी असल्याचा पुरावा नसल्यास त्यांनी दि. १३ ऑक्टोबर १९६७ पूर्वीचे वास्तव्य दाखविणारे प्रतिज्ञापत्र सादर करावे.तसेच, त्यांच्या कुळातील किंवा नातेसंबंधातील व्यक्तींना कुणबी जातीचे प्रमाणपत्र मिळाले असल्यास व त्यांनी अर्जदारासंबंधी प्रतिज्ञापत्र दिल्यास, स्थानिक समिती आवश्यक चौकशी करून अहवाल सादर करेल. सक्षम प्राधिकारी या चौकशीच्या आधारे अर्जदारास कुणबी जातीचा दाखला देण्याचा निर्णय घेतील. याबाबत कार्यपध्दती करण्यात आलेला शासन निर्णयात नमूद करण्यात आली आहे.