महा समाचार

पूर्णेतील देऊळगांव (दु)येथील घटना;पालीकेच्या अग्निशमन दलाच्या जवानांनी २० तासांनी शोधला मृतदेह पूर्णा, ता. १९ (प्रतिनिधी) :   सततची नापिकी, शेतीवरील कर्जाचा वाढता भार आणि वृद्ध आई-वडिलांच्या  भविष्याची चिंता यामुळे विवंचनेत असलेल्या ३१ वर्षीय शेतकरीपुत्राचा गोदावरी नदीपात्रात मृतदेह आढळून आल्याची हृदयद्रावक घटना देऊळगाव दुधाटे येथे घडली. शुक्रवारी सायंकाळी नदीपात्रात उडी घेतल्याची माहिती मिळाल्यानंतर पूर्णा नगरपालिकेच्या अग्निशमन दलाने तब्बल २० तास शोधमोहीम राबवली. अखेर तरुणाचा मृतदेह त्याच्या शेतापासून सुमारे दोन किलोमीटर अंतरावर शनिवारी सकाळी आढळून आला.      बालाप्रसाद संतोष सोनवळे (वय ३१, रा. देऊळगाव दुधाटे, ता. पूर्णा, जि. परभणी) असे मृत तरुणाचे नाव आहे.मिळालेल्या माहितीनुसार, बालाप्रसाद यांचे वडील संतोष सोनवळे यांच्या नावे देऊळगाव शिवारात गोदावरी नदीकाठी सुमारे तीन एकर शेती आहे. या शेतीवर त्यांनी संबंधित सहकारी संस्था तसेच ताडकळस येथील एसबीआय शाखेतून सुमारे तीन लाख रुपयांचे पीककर्ज घेतले होते. मागील काही वर्षांपासून हवामानातील अनिश्चितता आणि ओलाकोरडा दुष्काळ यामुळे शेतीचे मोठे नुकसान होत असल्याने उत्पन्नावर परिणाम झाला होता. शेतीची नापिकी, कर्जाची परतफेड कशी करायची आणि वृद्ध आई-वडिलांचा  सांभाळ  कसा करायचा, या चिंतेत  बालाप्रसाद असल्याचे कुटुंबीयांकडून सांगण्यात आले. शुक्रवारी (ता.१७) सायंकाळी साडेचारच्या सुमारास तो आपल्या शेताजवळ गोदावरी नदीकाठी गेला. त्यानंतर त्याने नदीपात्रात उडी घेतल्याचे परिसरातील शेतकऱ्यांच्या निदर्शनास आले. प्रवाह वेगवान असल्याने परिसरातील नागरिकांनी त्याला वाचवण्याचा प्रयत्न केला; मात्र तो पाण्यात दिसेनासा झाला. घटनेची माहिती गावचे पोलीस पाटील शिवाजी दुधाटे यांच्यासह गंगाखेड पोलिसांना देण्यात आली.माहिती मिळताच जमादार विजय चव्हाण, पोलीस कर्मचारी भारत पवार यांनी घटनास्थळी धाव घेतली. त्यानंतर पूर्णा नगरपालिकेच्या आपत्ती व्यवस्थापन व अग्निशमन दलाच्या जवानांना पाचारण करण्यात आले. गणेश रापतवार, दीपक गवळी, सोनाजी खिल्लारे, तनवीर कुरेशी, नागेश खंदारे, अनिल बनसोडे, प्रकाश मकासरे आदी जवानांनी नदीपात्रात शोधमोहीम सुरू केली.        रात्रीच्या अंधारामुळे शोधकार्यात अडथळे निर्माण होत असल्याने शनिवारी सकाळी पुन्हा शोधमोहीम सुरू करण्यात आली. अखेर तब्बल २० तासांच्या अथक प्रयत्नांनंतर बालाप्रसादचा मृतदेह त्याच्या शेतापासून सुमारे दोन किलोमीटर अंतरावर पथकाच्या हाती लागला.दरम्यान, या घटनेप्रकरणी मृताचे वडील संतोष सोनवळे यांनी दिलेल्या खबरीवरून गंगाखेड पोलीस ठाण्यात अकस्मात मृत्यूची नोंद करण्यात आली आहे. पोलिसांनी मृतदेह ताब्यात घेऊन शवविच्छेदनासाठी प्राथमिक आरोग्य केंद्र, धानोरा काळे येथे पाठविला आहे. पुढील तपास जमादार विजय चव्हाण करीत आहेत.