परळी लोहमार्गावरील रेल्वे सेवा सुरळीत

**वडगाव निळा येथे रुळ खचल्याने दोन दिवस सेवा होती विस्कळीत; प्रवाशांना आता दिलासा**

**परभणी, ता. २९ (प्रतिनिधी)** –

परभणी–परळी या रेल्वेमार्गावरील वाहतूक दोन दिवस विस्कळीत झाल्यानंतर आता पुन्हा सुरू झाली आहे. वडगाव निळा–गंगाखेड दरम्यान रेल्वे पटरी दबल्याने काही गाड्या रद्द किंवा अंशतः रद्द करण्यात आल्या होत्या. त्यामुळे प्रवाशांना मोठ्या प्रमाणावर गैरसोय सहन करावी लागली.

रेल्वे विभागाने तातडीने पथक नेमून युद्धपातळीवर दुरुस्तीचे काम केले. अल्पावधीत काम पूर्ण करून आजपासून (२९ सप्टेंबर २०२५) वाहतूक पूर्ववत करण्यात आली आहे.

दक्षिण मध्य रेल्वेच्या नांदेड विभागाच्या जनसंपर्क कार्यालयाने दिलेल्या माहितीनुसार, पुढील दोन गाड्या पुन्हा सुरू करण्यात आल्या आहेत –

* **गाडी क्र. 57654 आदिलाबाद–परळी सवारी गाडी** – पूर्वी अंशतः रद्द करण्यात आलेली गाडी आता पूर्णपणे सुरू झाली आहे.

* **गाडी क्र. 57655 परळी–अकोला सवारी गाडी** – ही गाडी देखील आता नियोजित वेळापत्रकानुसार धावणार आहे.

रेल्वे प्रशासनाकडून सांगण्यात आले की, प्रवाशांच्या सोयीसाठी दुरुस्तीचे काम अतिशय जलदगतीने पूर्ण करण्यात आले. त्यामुळे परभणी–परळी मार्गावरील वाहतूक टप्प्याटप्प्याने पूर्ववत होत आहे.या निर्णयामुळे गेल्या दोन-तीन दिवसांपासून प्रवासात अडथळे सहन करणाऱ्या प्रवाशांना मोठा दिलासा मिळाला आहे.