“वैशिष्ट्यपूर्ण” योजनेंतर्गत उत्कृष्ट उद्यान विकासासाठी राज्यातील पालीकांना मिळणार १ कोटींचा निधी
मुंबई, दि. १७ सप्टेंबर २०२५ :
राज्यातील नगरपरिषदांना “वैशिष्ट्यपूर्ण” कामांसाठी महाराष्ट्र शासनाच्या नगर विकास विभागामार्फत विशेष अनुदान देण्यात येणार आहे. या योजनेअंतर्गत प्रत्येक नगरपरिषद व नगरपंचायतींमध्ये उत्कृष्ट उद्यान विकसित करण्यासाठी रु. १ कोटी (अक्षरी एक कोटी रुपये) इतका निधी मंजूर करण्यात आला आहे.
नगरविकास विभागाने काढलेल्या शासन निर्णयानुसार विकसित होणाऱ्या या उद्यानांना “नमो उद्यान” असे नाव दिले जाणार आहे. नागरिकांना स्वच्छ व दर्जेदार उद्यानाची सुविधा उपलब्ध करून देण्यासाठी हे पाऊल उचलण्यात आले आहे.
शासन निर्णयातील ठळक मुद्दे :
- राज्यातील सर्व नगरपरिषदांना व नगरपंचायतींना “नमो उद्यान” विकसित करण्यासाठी प्रत्येकी रु. १ कोटी निधी मिळणार.
- विकसित उद्यानांबाबत विभागीय स्तरावर स्पर्धा आयोजित करण्यात येईल. यात उत्कृष्ट उद्यानाची निवड करून त्याला विशेष गौरव मिळणार आहे.
- स्पर्धेत विजेत्या उद्यानासाठी विभागीय पातळीवर पहिला, दुसरा व तिसरा क्रमांक निवडून अनुक्रमे रु. ४० लाख, रु. ३० लाख व रु. २० लाख इतका अतिरिक्त निधी देण्यात येईल.
- या निर्णयामुळे शहरी भागातील नागरिकांना स्वच्छ, हिरवेगार व आकर्षक उद्यानांचा लाभ मिळणार असून मुलांना, ज्येष्ठांना व महिलांना सुरक्षित आणि आनंददायी वातावरण मिळेल.
पार्श्वभूमी :
पूर्वी विविध शासन निर्णयांद्वारे नगरपरिषदांना वैशिष्ट्यपूर्ण कामांसाठी मार्गदर्शक तत्त्वे देण्यात आली होती. त्यानुसार आता “वैशिष्ट्यपूर्ण” या योजनेंतर्गत राज्यातील प्रत्येक नगरपरिषद व नगरपंचायतींमध्ये “नमो उद्यान” विकसित करण्याची प्रक्रिया सुरू होणार आहे.
निष्कर्ष :
या योजनेमुळे राज्यातील शहरी भागातील नागरिकांना स्वच्छता, पर्यावरण संवर्धन व आरोग्यदायी जीवनशैलीला चालना मिळेल, असे स्पष्ट झाले आहे. “नमो उद्यान” योजना ही राज्य शासनाची महत्त्वाकांक्षी योजना ठरणार आहे.