आंबेजोगाईची आदिमाया योगेश्वरी नवरात्रात भक्तांची मांदियाळी

परळी ता.२६ (प्रतिनिधी)-बीड जिल्ह्यातील अंबेजोगाई येथील आदिमाया योगेश्वरी देवीचे मंदिर हे भाविकांचे मोठे श्रद्धास्थान आहे. नवरात्र उत्सवात दरवर्षी येथे मोठ्या प्रमाणात भक्तांची गर्दी होत असून मंदिर परिसर भक्तिभावाने गजबजतो.महाराष्ट्रात साडेतीन शक्तीपीठे आहेत, परंतु त्यापलीकडे अनेक शक्तीस्थानेही आहेत. त्यामध्ये अंबेजोगाईची योगेश्वरी विशेष मानली जाते. आख्यायिकेनुसार राक्षस देतासूराचा वध करण्यासाठी पार्वतीने योगेश्वरीचा अवतार घेतला.
त्रिपुरसुंदरी या नावाने प्रकट झालेल्या पार्वतीचे लग्न परळी येथील वैजनाथाशी ठरले होते. मात्र, तिला लग्न करायचे नव्हते. विवाहाचा मुहूर्त निघाल्यावर तिने स्पष्ट नकार दिला आणि अंबेजोगाई येथेच कायम कुमारिका म्हणून राहिली, अशी कथा सांगितली जाते. त्यामुळेच योगेश्वरीला कुमारिका देवी म्हणून मानले जाते.

मंदिराचे वैशिष्ट्य

• योगेश्वरीची मूर्ती शेंदरी असून तिचे रूप आक्रमक दिसते.
• भाविक देवीला पानाचा विडा अर्पण करतात, ही परंपरा अनेक वर्षांपासून चालत आली आहे.
• देवी नवसाला पावणारी म्हणून ओळखली जाते.

नवरात्र उत्सवाचे कार्यक्रम

नवरात्र काळात मंदिरात विविध धार्मिक कार्यक्रम होतात.

• पहाटे काकड आरती केली जाते.
• अष्टमीला शतचंडी हवन तर नवमीला पूर्णाहूती दिली जाते.
• दसर्‍याच्या दिवशी देवीची पालखी गावातून मिरवणुकीत काढली जाते. ढोल-ताशे, भजन-कीर्तन आणि जयघोषामुळे वातावरण दुमदुमते.
• नवरात्रात देवीला सुवर्ण आणि रौप्य अलंकारांनी सजवले जाते.

भाविकांचा उत्साह

मार्गशीर्ष शुद्ध पौर्णिमेलाही येथे देवीचा जन्मोत्सव साजरा केला जातो. मात्र शारदीय नवरात्रात येथे भाविकांची मोठी गर्दी होते. अंबेजोगाईसह आसपासच्या भागातूनच नव्हे, तर राज्यभरातून भाविक दर्शनासाठी येतात. अंबेजोगाईची आदिमाया योगेश्वरी ही केवळ ग्रामदैवत नाही, तर भक्तांच्या विश्वासाला प्रतिसाद देणारी आणि श्रद्धेचा आधार देणारी देवी म्हणून ओळखली जाते.